Ligazóns Saltar a: como evitar erros comúns

Os “mecanismos para saltar bloques de contido” (máis coñecidos como “ligazóns saltar a”) son unha característica de accesibilidade esencial que permite ás persoas usuarias evitar os menús de navegación e outros bloques de contido repetitivos.

A maioría dos CMS (sistemas de xestión de contidos) implantan automaticamente o mecanismo para saltar os bloques de contido (as “ligazóns saltar a”). Noutras palabras, se creas o teu sitio web cun CMS ou instalando un plugin, é probable que xa teñas o mecanismo para saltar bloques de contido, aínda que, por desgraza, non sempre funciona.

Nalgúns casos, o mecanismo funciona perfectamente (mesmo se o propietario da páxina non sabe que o sitio o ten). Aínda así, é boa idea comprobar como funciona no sitio web.

Quen se beneficia das “ligazóns saltar a” de navegación?

As “ligazóns saltar a” son importantes para as persoas que usan só o teclado (sen rato) para navegar por Internet. Isto inclúe as persoas que utilizan lectores de pantalla (software que converte o texto en audio ou braille) e outras tecnoloxías de apoio.

As persoas usuarias de teclado navegan principalmente coas teclas Tab e Maiús+Tab, que moven o foco do teclado cara adiante e cara atrás na páxina web.

Se un sitio web ten ducias de hiperligazóns de navegación na parte superior de cada páxina, quizais teñas que premer a tecla Tab moitas veces para chegar ao contido en cada páxina, o que resulta frustrante, sobre todo se estás nun proceso de varias páginas (como o proceso de compra dun artigo no sitio web).

Os mecanismos para saltar bloques de contido adoitan aparecer cando a persoa usuaria preme Tab por primeira vez nunha páxina nova. Pode premer Intro para activalo e evitar así os elementos repetitivos que aparecen en todo o sitio web.

Pero... e se a miña páxina non o ten? Como o implanto?

En realidade trátase simplemente dunha ligazón que leva ao primeiro elemento da páxina despois do bloque de contido repetitivo. A continuación déixoche o código para que o copies e o pegues no teu sitio web. Pero coidado: debes cambiar o identificador polo primeiro identificador que haxa despois do bloque que queiras saltar (neste caso usamos 'Content').

Ao comezo do body debemos incluír o seguinte código nalgún HTML xenérico, por exemplo no da cabeceira:

<a class='admin-bar skip-link' href='#content'>Saltar ao contido principal</a>

E na folla de estilos ou na cabeceira:

.skip-link{ z-index: 9999; padding: 5px; padding: 0.5rem; font-size: 1rem; color: #000; background: #FFF; position: absolute; top: -5rem;}

.skip-link:focus{top:0;} 

Debemos asegurarnos de que en todo o sitio web o corpo estea sempre identificado co id 'content'.

Erros comúns de accesibilidade coas “ligazóns saltar a”:

As Pautas de Accesibilidade para o Contido Web (WCAG) esixen  “ligazóns saltar a” no Criterio de conformidade (SC) 2.4.1, 'Bypass Blocks' (Evitar bloques). Este é o texto completo do requisito:

'Dispoñerase dun mecanismo para evitar os bloques de contido que se repiten en varias páxinas web'.

Vimos moitas implantacións de “ligazóns saltar a” que cumpren o criterio WCAG SC 2.4.1, pero non cumpren outros criterios importantes.

Para saber se o mecanismo para saltar bloques de contido do teu sitio web mellora a accesibilidade, próbao e comproba se comete algún destes erros comúns:

1. O texto da ligazón non explica ben o seu propósito

Segundo o WCAG SC 2.4.4, 'Link Purpose (In Context)' (Propósito das ligazóns [en contexto]), todas as hiperligazóns deben ter un texto que explique o seu propósito. Noutras palabras, as persoas usuarias deben poder entender exactamente cal é o propósito ou a función da ligazón que van seguir.

Se o teu mecanismo para saltar bloques de contido ten un texto curto, por exemplo, 'saltar' ou 'bypass', algunhas persoas non saberán para que serve. É moito mellor poñer un texto un pouco máis longo pero que se entenda. Por exemplo, ‘Ir ao contido’ ou ‘Saltar ao contido’.

2. O mecanismo para saltar bloques de contido  é invisible.

Moitos sitios web teñen este mecanismo oculto visualmente ata que a persoa usuaria preme a tecla Tab por primeira vez. Iso é aceptable, pero asegúrate de que o mecanismo se faga visible cando recibe o foco do teclado.

Lembra que a accesibilidade web non é só para persoas cegas: hai persoas con diferentes tipos de discapacidade. Moitas persoas usuarias de teclado poden percibir o contido visualmente e, se o teu mecanismo non aparece realmente na páxina, algunhas non poderán atopalo.

3. Os mecanismos para saltar bloques de contido teñen un texto con pouco contraste.

Todo o contido de texto debe manter unha relación de contraste de cor axeitada co seu fondo (hai analizadores de contraste de cor para iso). Se non, o texto pode resultar ilexible para as persoas con deficiencias na visión da cor e outras discapacidades visuais.

Isto tamén se aplica ao mecanismo. O WCAG SC 1.4.3 esixe un contraste mínimo de 4,5:1 para o texto normal e de 3:1 para o texto grande. Noutras palabras, o texto debe destacar o suficiente sobre o seu fondo para que todo o mundo o poida ler facilmente.

4. O sitio web ten demasiados mecanismos para saltar bloques de contido.

Podes ter boas razóns para engadir máis dunha 'ligazón saltar a' nunha páxina. Por exemplo, se publicaches un artigo que ocupa varias páxinas, podes incluír unha táboa de contidos ao comezo de cada páxina. Tamén poderías incluír unha “ligazón saltar a” para o menú de navegación e outra “ligazón saltar a” distinta para evitar a táboa de contidos.

É importante que lembres que as persoas usuarias de teclado terán que pasar por cada mecanismo de salto antes de chegar ao contido. A maioría dos sitios web só necesitan unha ou dúas “ligazóns saltar a”; se engades de máis, pensa en como afectarán á experiencia de usuario. As pautas son máis eficaces se as aplicas antes de crear o contido, e non despois.

Se queres axuda con algún problema de accesibilidade ou saber se o teu sitio web é realmente accesible para todas as persoas usuarias, ADDAW pode axudarche cunha auditoría completa da túa páxina web.

Resumo.

Puntos clave:

1. Ligazóns para saltar bloques de contido:

-Esenciais para a accesibilidade, permiten evitar os menús repetitivos.

-Algúns CMS implantan os mecanismos para saltar bloques de contido automaticamente ou a través dalgún plugin.

2. Quen se beneficia:

-Importantes para as persoas usuarias de teclado (sen rato), como as que usan lectores de pantalla.

3. Funcionamento:

-Navegación principal coas teclas Tab e Maiús+Tab.

-Evitan a frustración de premer Tab moitas veces para chegar ao contido.

4. Erros comúns:

Texto confuso:

-Debe explicar claramente o propósito; evita termos pouco claros ou curtos como 'saltar' ou 'bypass'.

-Recomendamos un texto máis descritivo, como 'Ir ao contido' ou 'Saltar ao contido'.

5. Ligazón oculta:

-Que estea oculta visualmente é aceptable, pero debe facerse visible ao recibir o foco do teclado.

6. Pouco contraste:

-A “ligazón saltar a” debe ter un contraste axeitado para que se poida ler, seguindo os estándares WCAG.

7. Demasiadas ligazóns:

-Limítaas a unha ou dúas para non complicar a experiencia das persoas usuarias de teclado.

8. Axuda especializada:

-Asociacións como ADDAW poden facer unha auditoría completa para garantir a accesibilidade da túa páxina web.

Gisela López Ramón