Accesibilidade fronte a emojis

Os emojis están en todos os recunchos de Internet. Toda a xente que coñezo usa emojis, desde os meus avós ata o irmán de 5 anos dun amigo. Eu, persoalmente, uso emojis a diario. Bótolle un par deles cando falo cos amigos ou cando quero darlles algo de cor aos comentarios nas redes sociais. Ti seguramente tamén os usas, ou polo menos coñeces xente que o fai. Os emojis poden ser unha forma xenial e divertida de transmitir emocións. Tamén engaden interese visual e poden ser unha maneira rápida de dicir moito cun só carácter. Dito isto, que tal lles van os emojis a quen non os pode ver?

Segundo a Organización Mundial da Saúde, 'polo menos 2.200 millóns de persoas teñen unha discapacidade visual de preto ou de lonxe'. Para sermos inclusivos con todos os graos de visión (ou coa falta dela), necesitamos saber como comunicarnos de maneira accesible.

Os lectores de pantalla poden ler en voz alta os emojis ás persoas usuarias. Se os emojis se usan correctamente, poden transmitir toda a emoción e o contexto previstos, aínda que non se vexan. Antes de determinar como usar mellor os emojis, imos descubrir como os 'ven' os lectores de pantalla.

Os lectores de pantalla len a cadea Unicode dos emojis para identificalos. Isto é semellante ao texto ALT das imaxes.

Uso de emojis accesibles

Para que uses os emojis dun xeito que beneficie a todo o mundo, vouche dar algúns consellos. Poden engadir diversión e contexto a unha publicación ou a unha mensaxe. Pero tamén poden provocar frustración e que a xente abandone.

1. Usa os emojis con moderación

Seguro que todos coñecemos a alguén que fai spam con tres ou máis emojis iguais seguidos. E sei que ti tamén o fixeches! Ás veces, eses vídeos de gatos asustados polos cogombros merecen varios emojis de 'rebolarse polo chan coa risa'. Podes facer spam aos teus amigos e familiares videntes todo o día, pero ten coidado cando publiques para un público máis amplo. Isto é especialmente importante cando usas emojis no teu sitio web.

Se lle envías a alguén cinco emojis de 'polgar cara arriba', o lector de pantalla lerá as palabras 'polgar cara arriba' cinco veces. Evidentemente, isto pode resultar moi frustrante e leva moito tempo. Se vas usar emojis, tenta usar só un ou dous.

2. Úsaos ao final

Pode ser confuso 'cara con ollos en espiral' para as persoas usuarias de lectores de pantalla 'ollo nun globo de diálogo' cando usas emojis no medio 'montón de caca' das túas frases.

Poñer emojis no medio dunha frase ou dun parágrafo 'interrompe a lectura das persoas con discapacidade visual e ofrece unha experiencia de usuario deficiente'. Recoméndase colocar os emojis ao final da mensaxe para que quen usa lectores de pantalla poida seguilos facilmente.

'Un amigo envioume o outro día unha mensaxe que dicía isto: 'Deséxoche un próspero cara de aninovo emocionada con símbolos de diñeiro nos ollos e cara emocionada coa lingua fóra con símbolos de diñeiro nos ollos e cara emocionada con símbolos de diñeiro nos ollos e cara emocionada coa lingua fóra nos ollos e a lingua fóra. Estás libre esta noite? Chámame'... Nunca cheguei á parte na que se supoñía que tiña que chamalo'. – Beth, de Easterseals.

3. Non substitúas palabras

Nunca uses un emoji para substituír unha palabra real. Isto fai que a mensaxe sexa máis difícil de entender para TODAS as persoas usuarias, non só para as que teñen discapacidade visual.

'Por exemplo, se substitúes a palabra 'arrepiante' por un emoji de cara asustada, aínda que algunhas persoas poidan captar o significado da túa mensaxe, para un usuario de lector de pantalla a publicación pode dicir 'O Samaín foi así, cara berrando de medo, este ano''.

A min tamén me custa ler este tipo de mensaxes. Por favor, pónllelo máis doado a todos e usa palabras. Non quero descifrar o teu tuit coma se fose unha pintura rupestre.

4. Non fagas listas con emojis como viñetas, por favor

Atopo listas que usan emojis como viñetas TODOS OS DÍAS en LinkedIn. Claro, os emojis poden darlle moito interese visual á túa publicación, pero só necesitas un ou dous para captar a atención de alguén. A túa publicación ten moito máis valor para quen a le se realmente se pode ler.

5. Non te fíes dos emojis

Non hai dúbida de que os emojis ofrecen unha solución rápida para transmitir cousas axiña. Moita xente comezou a usalos como muleta para transmitir emoción e contexto sen ter que dicir nada. Isto pode ser útil nas túas conversas informais, pero se confías nos emojis para a comunicación pública, non conseguirás que a túa mensaxe lle chegue a todo o mundo.

6. Coidado co contexto

Probablemente o teu público abrangue varias culturas, grupos de idade e nacionalidades. Cada un destes grupos pode entender o significado dos emojis de forma moi diferente, así que algo inocente pode significar algo completamente distinto para eles. Estoume referindo a ti, emoji da berenxena.

Os emojis naceron para ser divertidos, e sono! Só tes que lembrar usalos con cabeza para que todo o mundo poida gozalos.

Artigo traducido de uxdesign

Pablo Alcaraz Pérez