Metodoloxía de avaliación WCAG-EM

Como podo saber se a miña web é accesible para as persoas con discapacidade?

A resposta é moi rápida: cunha auditoría de accesibilidade independente de conformidade coas Pautas de accesibilidade para o contido web (WCAG). 

Publicadas polo Consorcio World Wide Web (W3C), as WCAG son o conxunto de normas de accesibilidade dixital máis utilizado a nivel internacional. Ao demostraren a súa conformidade coas WCAG, as empresas poden amosar o seu compromiso coa creación dunha internet mellor para todo o mundo. 

Porén, demostrar a conformidade coas WCAG require a auditoría dunha empresa allea ao W3C, e o W3C non avalía a exactitude destas auditorías. Tecnicamente, calquera sitio web pode declararse conforme sen cumprir realmente os puntos de control das WCAG, e os auditores independentes poden empregar distintos métodos para avaliar o contido.

Para solucionar este problema, o W3C publica a Metodoloxía de avaliación da conformidade da accesibilidade web (WCAG-EM). Como o seu nome indica, a WCAG-EM describe un proceso de avaliación de sitios web para garantir que cumpren as WCAG.

Se a túa empresa se compromete a ofrecer unha experiencia inclusiva para as persoas con discapacidade, recomendámosche que realices unha auditoría de accesibilidade que siga as prácticas recomendadas polo W3C e que te asegures de que o auditor que a fai segue a metodoloxía WCAG-EM, como sería o caso da nosa asociación “ADDAW”.

A continuación, ofrecémosche unha visión xeral rápida da WCAG-EM e da súa importancia no mundo da accesibilidade web.

O proceso de avaliación da accesibilidade web WCAG-EM

As auditorías de accesibilidade deben seguir un proceso coherente, pero como os sitios web modernos poden conter unha gran variedade de características, deseños, estruturas e estilos, determinar o alcance dunha auditoría non sempre é doado.

 A WCAG-EM describe un procedemento sinxelo de cinco pasos para as avaliacións de accesibilidade:

• Paso 1 - Definir o alcance da avaliación
• Paso 2 - Explorar o sitio web obxecto
• Paso 3 - Seleccionar unha mostra representativa
• Paso 4 - Auditar a mostra seleccionada
• Paso 5 - Informe de resultados

Cada paso inclúe recomendacións, boas prácticas e orientacións para os avaliadores. Por exemplo, no paso 1 defínense os obxectivos de conformidade (nivel A, AA ou AAA das WCAG), identifícanse os aspectos do sitio web obxecto que afectan ao alcance do proxecto (como o contido de terceiros ou as versións móbiles do sitio) e defínense as liñas base de accesibilidade e os requisitos adicionais da avaliación.

Así mesmo, o paso 3 inclúe orientacións cruciais para seleccionar unha mostra de páxinas web que poida representar axeitadamente todo o sitio. A WCAG-EM define un proceso para seleccionar unha mostra estruturada (páxinas comúns e relevantes que ofrezan unha funcionalidade esencial para as persoas usuarias) e unha mostra seleccionada ao chou (páxinas escollidas aleatoriamente que se auditarán na súa totalidade). 

Os avaliadores poden empregar as recomendacións da WCAG-EM para garantir que as auditorías dan resultados precisos e para ofrecerlles aos seus clientes orientacións claras sobre as medidas correctoras.

A WCAG-EM non inclúe directrices específicas para comprobar a conformidade.

Dado que a WCAG-EM está pensada para avaliadores cun coñecemento exhaustivo das pautas WCAG, non inclúe recomendacións para determinar a conformidade. Esta cuestión abórdase noutros recursos do W3C, en particular en Selecting Web Accessibility Evaluation Tools (Selección de ferramentas de avaliación da accesibilidade web), que describe as limitacións das probas de accesibilidade automatizadas.

Se a túa empresa traballa cun socio de accesibilidade, pregúntalle polos seus métodos de comprobación. Para obter resultados precisos, unha auditoría de accesibilidade debería:

• Empregar probas manuais e automatizadas.
• Incluír achegas de expertos en accesibilidade, desenvolvedores e persoas con discapacidade.
• Ofrecer orientacións para solucionar o problema.
• Proporcionar recursos para elaborar unha declaración de accesibilidade que demostre a conformidade.
• Lembra que a accesibilidade non é un proxecto puntual. O teu contido pode requirir varias auditorías durante o desenvolvemento e avaliacións adicionais tras cambios ou actualizacións importantes.
  

Unha auditoría de accesibilidade pode axudar o teu sitio a obter, manter e demostrar a conformidade coas WCAG.

A WCAG-EM define as mellores prácticas para as auditorías de accesibilidade, pero non inclúe recomendacións para avaliar os sitios web característica por característica. Para garantir o cumprimento das leis de accesibilidade e ofrecerlles ás túas persoas usuarias a mellor experiencia posible, necesitarás avaliadores profesionais que coñezan en profundidade o marco WCAG.

ADDAW utiliza unha metodoloxía de probas híbrida de catro puntos que combina a supervisión manual de expertos con avaliacións automatizadas. Cremos que o noso enfoque ofrece o mellor camiño para acadar e manter a conformidade coas WCAG.

Pablo Alcaraz Pérez