Como crear vídeos accesibles

Os vídeos están en todas partes e cada vez os consome máis xente. Segundo Statista, actualmente hai máis de 250 millóns de consumidores de vídeo só nos Estados Unidos.

Pero como podemos asegurarnos de que todo o mundo poida acceder ao contido de vídeo que creamos?

Crear vídeos accesibles pode ampliar moitísimo o seu alcance. Hoxe en día hai unha gran cantidade de vídeos que non se crean pensando na accesibilidade por medo a que suban os custos de produción, pero non ten por que ser así, sobre todo se temos en conta a accesibilidade desde o principio

Quen se beneficia dos vídeos accesibles?

Un vídeo accesible pode ser útil para calquera persoa segundo a situación na que se atope, pero para moitas persoas con discapacidade a accesibilidade é imprescindible. Con isto en mente, presentamos unha lista de comprobación para crear vídeos accesibles. Algúns destes elementos son obrigatorios e tamén é importante ter en conta outros factores. Deste xeito, poderás crear un vídeo accesible que che permita chegar a un público moito máis amplo.

Pasos para crear vídeos accesibles

1. Crear contido de vídeo accesible

O material que compón o propio vídeo é fundamental para que sexa accesible, polo que crear un vídeo accesible é moito máis doado se se teñen en conta os pasos e as consideracións correctas desde o principio.

• Usar as cores con coidado e con bo contraste: hai que asegurarse de que a información non se transmita só mediante cores e, cando se usen cores, de que se distingan o suficiente. O ideal é aplicar este principio a calquera contido que transmita información, como textos ou gráficos. Para probar unha páxina web segundo as pautas WCAG 2.1, consulta o 'The a11y® Color Contrast Accessibility Validator.'.
• Usar texto doado de ler: cando se amose texto na pantalla, hai que asegurarse de que o tamaño da letra sexa suficientemente grande e de que o texto permaneza na pantalla o tempo suficiente para lelo.
• Evitar os escintileos rápidos: débese evitar nos vídeos o contido con escintileos rápidos ou, se se inclúe, hai que garantir que respecte o límite de tres escintileos ou menos por segundo. Superar este límite pode provocar convulsións nalgunhas persoas con trastornos convulsivos.

2. Escoller un formato de vídeo actual para a web

O formato é vital para a accesibilidade. Antes de crear un vídeo, hai que comprobar que o formato no que se entregará o ficheiro é suficientemente actual para cargalo e reproducilo sen problemas.

3. Escoller un reprodutor de vídeo accesible

• Hai que asegurarse de que o reprodutor de vídeo admita subtítulos, transcricións e audiodescricións.
• Comprobar que todos os controis, como o volume, a reprodución e a pausa, se poidan manexar co teclado e teñan etiquetas accesibles para as tecnoloxías de apoio, como os lectores de pantalla.
• Evitar que os vídeos se reproduzan automaticamente cando se carga a páxina web. Isto pode resultar confuso para moitas persoas usuarias e o son pode interferir coas tecnoloxías de apoio, como os lectores de pantalla.

4. Engadir subtítulos ao vídeo

O Criterio de conformidade WCAG 1.2.2 Subtítulos (nivel A) establece que se deben proporcionar subtítulos para todo o contido de audio gravado en multimedia sincronizada, agás cando a presentación sexa unha alternativa multimedia ao texto e estea claramente identificada como tal.

Isto significa que todos os vídeos gravados deben ter subtítulos, é dicir, alternativas en texto do contido de audio sincronizadas co vídeo. Os sitios de aloxamento de vídeos máis populares, como YouTube e Facebook, ofrecen opcións de subtitulado.

Os subtítulos para persoas xordas non se deben confundir cos subtítulos que adoitamos ver nas películas en versión orixinal: parécense, pero non son iguais. Mentres que os subtítulos convencionais son unha tradución directa do diálogo do vídeo, a miúdo noutro idioma, os subtítulos para persoas xordas non só recollen en texto o que se di, senón que tamén inclúen unha descrición da música ou dos sons de fondo, para ofrecer o mesmo nivel de información que se obtería escoitando o audio.

Para cumprir os estándares de accesibilidade do contido web, é importante incluír sempre subtítulos para persoas xordas nos vídeos gravados ou ofrecer subtítulos en tempo real nos vídeos en directo. Segundo WebAIM, 'os subtítulos deben ser:

• Sincronizados: o texto debe aparecer aproximadamente ao mesmo tempo que o audio.
• Equivalentes: o contido dos subtítulos debe ser equivalente ao que se di.
• Accesibles: o contido dos subtítulos debe ser de fácil acceso e estar dispoñible para quen o necesite.

Beneficios de subtitular os vídeos

Ademais do beneficio no que pensa a maioría da xente (facer que os contidos sexan accesibles para as persoas xordas ou con perda auditiva), os subtítulos teñen outras vantaxes.

• Os subtítulos axudan a aumentar a audiencia. Os subtítulos multilingües son unha excelente maneira de facer que un vídeo sexa accesible para todo o mundo. Abren o vídeo a persoas que falan un idioma diferente daquel no que se creou e permiten que o contido teña o maior alcance posible.
• Os subtítulos axudan en contornas ruidosas, como no autobús, ou en lugares onde hai que estar en silencio, como unha biblioteca ou o traballo. Calcúlase que o 85 % dos vídeos de Facebook se ven sen son.
• Os subtítulos melloran o SEO dun vídeo, xa que os buscadores indexan mellor o contido en forma de texto.
• Os subtítulos poden ser pechados ou abertos. Os pechados pódense activar ou desactivar, mentres que os abertos sempre están visibles. Para comodidade do público, a maioría dos sitios web ofrecen subtítulos para o contido de vídeo. 

5. Engadir unha transcrición aos vídeos

As transcricións pódense considerar versións en texto do teu vídeo. Unha transcrición debe incluír non só o que se di no vídeo, senón tamén descricións das accións ou da información importante que aparece na pantalla. En xeral, un vídeo totalmente accesible debe incluír subtítulos e unha transcrición.

Hai varias opcións para crear unha transcrición:

• Dar formato aos subtítulos e reutilizalos: se xa tes un ficheiro de subtítulos, podes editalo ou completalo e usalo como transcrición.
• Utilizar un servizo profesional de transcrición: hai moitos servizos que transcriben ficheiros de audio e vídeo e entregan a transcrición en formato HTML a cambio dunha tarifa.
• Empregar un software de recoñecemento de voz, como Dragon NaturallySpeaking, un dos programas máis populares do mercado. Porén, como calquera outra tecnoloxía de voz, este software necesita «adestramento» para comprender a voz, o acento, o ton, etc., e ten unha curva de aprendizaxe inicial.
• Escribir o contido a man: para quen crea vídeos de cando en vez, é unha boa opción para comezar.

Beneficios de transcribir un vídeo

Incluír unha transcrición do teu vídeo ten as súas vantaxes:

• Unha persoa cega, con outras discapacidades ou que non poida ou prefira non ver o vídeo poderá obter toda a información en forma de texto.
• Unha persoa que utiliza tecnoloxías de apoio, como un lector de pantalla, para acceder a unha transcrición pode obter o mesmo contido en menos tempo ca escoitando o audio real. Isto é así porque as persoas usuarias experimentadas de lectores de pantalla poden aumentar a velocidade de lectura a un ritmo moito máis rápido do que falamos.
• As transcricións poden ser útiles para todo o mundo en diferentes momentos; por exemplo, se alguén quere buscar algo concreto do vídeo, quizais prefira buscalo directamente na transcrición.
• Incluír unha transcrición fai que o teu vídeo sexa máis doado de atopar, xa que os buscadores indexan mellor o contido en forma de texto.

6. Incluír audiodescrición se é necesario

Cando na pantalla aparece información ou suceden accións importantes que non se describen claramente ou non son evidentes na pista de audio, unha audiodescrición pode axudar a completar a información que lle falta a quen non pode ver o que se amosa.

A audiodescrición defínese como unha «narración engadida ao audio para describir detalles visuais importantes que non se poden entender só co audio principal». É un medio para informar as persoas cegas ou con baixa visión sobre o contido visual esencial para comprender o vídeo. Proporciona información sobre accións, personaxes, cambios de escena, texto na pantalla e outros contidos visuais.

Se os vídeos se crean tendo en conta a accesibilidade, probablemente non sexan necesarias as audiodescricións, sempre que os elementos visuais importantes do vídeo se describan na propia pista de audio. Ou se, por exemplo, todo o vídeo é un home falando nun atril (ou outra presentación relativamente estática), as audiodescricións consideraríanse, en xeral, innecesarias.

Resumo: vídeo accesible

Un vídeo accesible inclúe xeralmente subtítulos, unha transcrición e un uso coidadoso da cor dos textos e dos escintileos. Debe crearse nun formato accesible para os reprodutores multimedia e pode incluír unha audiodescrición cando a pista de son predeterminada non sexa suficiente.

David Prieto González