Árbore de decisión para escribir un texto alternativo

Un texto alternativo é o texto que identifica a imaxe para as persoas con problemas de visión que necesitan utilizar lectores de pantalla. En concreto, cando estes lectores de pantalla atopan unha imaxe, len en voz alta o seu texto alternativo. 

Debemos ter sempre presente que o obxectivo prioritario deste texto é que estas persoas poidan consumir o contido en igualdade de condicións cunha persoa que si podería ver a imaxe. Se poñemos sempre no centro a experiencia de usuario destas persoas, concluiremos que non sempre lles resulta útil que se lles lea o texto, como por exemplo no caso dunha imaxe meramente decorativa, na que ler o texto alternativo non achegaría nada.

O W3C creou unha árbore de decisión moi útil para saber como proceder co texto alternativo segundo o tipo de imaxe. Neste artigo simplemente compartimos a tradución desta árbore e incluímos información que sempre é útil cando estás a pensar que texto alternativo poñer.

• A imaxe contén texto?
• Si:
• … e o texto tamén está presente preto como texto real.
• Trátase dunha imaxe decorativa: deixa o texto alternativo baleiro.
• … e o texto só se amosa por efectos visuais.
• Trátase dunha imaxe decorativa: deixa o texto alternativo baleiro.
• … e o texto ten unha función específica, por exemplo, é unha icona.
• Trátase dunha imaxe funcional. Utiliza o texto alternativo para comunicar a función ou o propósito da imaxe.
• … e o texto da imaxe non está presente doutra maneira.
• Trátase dunha imaxe de texto. Usa o texto alternativo para incluír o texto da imaxe. Este caso dáse moito, por exemplo, nos báneres de rebaixas. Nese caso, o texto alternativo debe recoller o contido da rebaixa.
• Non:
• Continúa.
• A imaxe úsase nunha ligazón ou nun botón? Sería difícil ou imposible entender o que fai a ligazón ou o botón se a imaxe non estivese alí?
• Si:
• Trátase dunha imaxe funcional. Utiliza o texto alternativo para comunicar o destino da ligazón ou a acción que se realiza. 
• Non:
• Continúa.
• A imaxe achega significado á páxina ou ao contexto actual?
• Si:
• … e é un gráfico sinxelo ou unha fotografía.
• Trátase dunha imaxe informativa. Pon no atributo «alt» unha breve descrición da imaxe que transmita ese significado.
• … e é un gráfico ou unha información complexa.
• Trátase dunha imaxe complexa. Inclúe a información que contén a imaxe noutra parte da páxina.
• … e amosa contido redundante con respecto ao texto real que hai preto.
• Incluír un texto alternativo sería redundante e, polo tanto, molesto. Utiliza un atributo «alt» baleiro. 
• Non:
• Continúa.
• A imaxe é puramente decorativa ou non está destinada ao usuario?
• Si:
• Trátase dunha imaxe decorativa. Utiliza un atributo «alt» baleiro. 
• Non:
• Continúa.
• Se chegaches ata aquí, debe de ser unha imaxe moi particular. Ten en conta que esta pequena árbore de decisión non abrangue todos os casos. O noso consello é que te preguntes: se só puideses escoitar o que amosa a páxina, que tipo de texto alternativo necesitarías para entender de forma realmente útil a parte do sitio web onde está a imaxe? Esta é a pregunta clave e, respondéndoa, saberás que facer.

David Prieto González