Como crear un bo texto alternativo

Cando o texto alternativo se coloca ben, mellora tanto a accesibilidade do teu sitio web como o posicionamento da páxina; ademais, os usuarios que non poidan ver as imaxes e usen lectores de pantalla comprenderán mellor o contido da web e navegarán moito mellor por ela. Así mesmo, cando un motor de busca analiza a web, pode ler e indexar o texto alternativo, o que mellorará a súa posición nos resultados.

Pero como se escribe ben o texto alternativo? Nesta entrada deixámosvos os erros máis comúns que se cometen á hora de colocar este texto.

1. Usar a palabra “imaxe”

Un dos erros máis comúns é usar 'imaxe de' ou 'gráfico de' no texto alternativo antes de describir unha imaxe. Os lectores de pantalla xa identifican que é unha imaxe e dinllo ao usuario; non fai falta que o fagamos nós, é redundante e molesto. Están programados para recoñecer unha imaxe na pantalla dun ordenador e dirán 'imaxe' ou 'gráfico', e deixan a descrición da nosa man.

É importante comprender que o texto alternativo debe servir para que a persoa que non pode ver a imaxe entenda que é o que hai aí, así que intenta ser claro e conciso na descrición.

Ás veces é apropiado indicar o tipo de imaxe, pero só se é necesario para describila con precisión. Por exemplo, a imaxe dun gatiño xogando cun noveló podería ser unha ilustración ou un debuxo, e nese caso o texto alternativo podería dicir: “Gatiño xogando cun noveló. Ilustración'. Os diagramas, gráficos e gráficos circulares son outros exemplos de tipos específicos de imaxes nos que saber que son pode ser información crucial para o usuario final.

2. Non colocar o texto que contén unha imaxe

O texto que hai dentro dunha imaxe debe estar descrito no texto alternativo. Os anuncios adoitan conter texto que describe o produto; este texto é fundamental para comprender o contido da imaxe, así que non debemos esquecer poñelo no alt. Para imaxes con moito texto ou imaxes máis complexas, como diagramas ou gráficos, pode ser necesario incluír unha descrición longa adicional fóra do atributo alt da imaxe; para iso usaremos o atributo longdesc.

3. Incluír texto alternativo en imaxes ou elementos decorativos

Os elementos decorativos, como divisores ou elementos de deseño que non achegan contexto nin contido adicional, non necesitan texto alternativo. Teñen pouco sentido, ou son innecesarios, cando se len cun lector de pantalla. Pensa no propósito do teu gráfico e en se o texto alternativo achegará algunha información ou beneficio, ou complementará dalgún xeito o que está a ler o lector.

Un exemplo claro é o da imaxe dun teléfono que ten ao lado o texto «teléfono» e, xunto a este texto, o número en si. Describir a imaxe no alt será redundante e molesto para unha persoa, pois escoitará varias veces a mesma palabra.

Cando unha imaxe é meramente decorativa e non achega información ao usuario, é moito mellor non tentar describila. Por exemplo, se temos un artigo sobre novas tecnoloxías e a imaxe é unha morea de 0 e 1 ao estilo 'Matrix', esa imaxe non debería ter texto alternativo, pois en realidade poñelo non lle achegará nada á persoa que visita a web. Lembremos que o que fagamos debe ser útil.

Pero lembra: que unha imaxe non necesite texto alternativo non significa que poidas ignorala. Indícalle á tecnoloxía de apoio que omita as imaxes cun atributo alt nulo (alt='') ou usando list-style-image.

4. Repetir o mesmo texto no pé de foto e no texto alternativo

Mentres que o texto alternativo é axeitado para dar unha descrición breve dunha imaxe, os pés de foto poden ser útiles para descricións máis longas, imaxes complexas e galerías de fotos. Ás veces convén que unha imaxe teña tanto alt como pé de foto, pero nunca deben ser idénticos: o ideal é que sexan complementarios. Os lectores de pantalla lerán tanto o alt como o pé e, se son idénticos, resultará repetitivo e a experiencia na páxina resentirase.

O normal é que o pé de foto non describa o contido da imaxe á que acompaña (pois eses pés lenos persoas que ven), así que no alt deberiamos poñer a descrición pura do que se ve na foto e, no pé, o texto que a complementa. O máis doado é facernos esta pregunta: se pechase os ollos e unha máquina me lese o alt e o pé, tería a mesma información que se abrise os ollos, vise a imaxe e lese o pé?

5. Usar 'logotipo da empresa' como texto alternativo

Este é moi concreto, pero é tan común que hai que mencionalo. Sempre que apareza o logotipo da túa empresa no teu sitio web, debe incluír o nome da empresa no texto alternativo. Escribir 'logotipo da empresa' no alt é xenérico e pouco descritivo cando se accede cun lector de pantalla. Se o logotipo é unha ligazón á páxina de inicio (algo moi común), deberiamos poñer no alt o destino da ligazón, por exemplo: ADDAW, ir ao inicio.

6. Non utilizar unha linguaxe sinxela

Por que dicir 'utilizar' cando podes dicir 'usar'? Empregar unha linguaxe sinxela achega un nivel de precisión e accesibilidade útil para moitas persoas. Ademais, se o texto non é complexo, científico ou para un público especializado (como nunha revista médica), non ten ningún sentido facer que o texto alternativo desa información sexa máis pesado ou complicado do que debería.

7. Non coidar a ortografía nin os signos de puntuación

É moi común que os textos alternativos non teñan ningún signo de puntuación, pero a puntuación importa. Incluír puntos e comas permite que un lector de pantalla lea dun xeito máis natural, con pausas axeitadas para separar ideas, parágrafos ou outro contido. O mesmo pasa coa ortografía: as palabras mal escritas non se lerán correctamente e mesmo poden ter un significado diferente. Igual que coidas a ortografía e a puntuación cando escribes contido, deberías facer o mesmo co texto alternativo.

8. Non revisar nin actualizar nunca o texto

Cada vez que se revisa o contido da pantalla, débese revisar tamén o texto alternativo. Cando se actualizou a mensaxe do báner da última campaña, actualizouse o texto alternativo ou está a darlles información desfasada a algúns dos teus usuarios? Cando a empresa cambiou de marca ou fixo un redeseño, actualizáronse os textos alternativos para mantelos ao día? É fundamental para a túa mensaxe e a túa reputación que o texto alternativo estea actualizado.

ADDAW existe para axudar, así que, se tes dúbidas sobre que texto alternativo poñer nunha imaxe, non dubides en contactar connosco

David Prieto González