Certificación AIS

En ADDAW buscamos sempre a maneira de mellorar a calidade dos nosos servizos de auditoría en favor dunha accesibilidade universal. Para garantir a calidade do noso traballo, ofrecemos a Certificación AIS, outorgada pola Fundación Accesibilidad y Responsabilidad Social (ARS).

Quen é a Fundación ARS?

Para coñecer esta gran fundación temos que remontarnos aos anos 70, cando comeza un camiño desde o Colexio Albert Einstein dedicado á formación e ao deseño de novas pedagoxías.

Ao longo de máis de 30 anos, estes pioneiros da accesibilidade dedicaron o seu tempo e a súa visión a crear cursos e iniciativas para proporcionarlles os coñecementos necesarios a todas aquelas persoas que quixesen axudar ás persoas con dificultades de aprendizaxe, como o curso de Educador de Disminuidos Psíquicos alá polos anos 80, e ás persoas maiores con problemas para acceder ao mundo que as rodea, como a cualificación profesional de Técnico Gerocultor. Esta última daría paso á cualificación vixente na actualidade de Técnico en Atención a Persoas en Situación de Dependencia en institucións e domicilios.

Durante a primeira década dos 2000 desenvolvéronse programas específicos de inserción e accesibilidade para persoas con discapacidade en colaboración con diversas asociacións e coa Administración pública. Pero foi en 2006 cando, cun equipo multidisciplinar, comezaron a investigar a accesibilidade e crearon o Distintivo Indicador del Grado de Accesibilidad (DIGA).

Por fin, en 2009 deuse forma aos obxectivos sociais que se foran desenvolvendo e constituíuse a Fundación Shangri-La, en referencia á mística cidade tibetana da felicidade permanente.

Malia conseguir varios proxectos de accesibilidade e responsabilidade social ao longo dos anos, a fundación non cesou no seu empeño e seguiu investigando e investindo para mellorar e conseguir validacións ata que, en 2018, presentou a súa nova marca con rexistro internacional: Fundación Accesibilidad y Responsabilidad Social (ARS).

Nese momento preséntase o Certificado AIS (Accesibility Indicator System ou Sistema Indicador de Accesibilidade), evolución do DIGA, baseado na Norma AIS 1/2018. Esta norma está validada e recoñecida pola certificadora internacional IMQ.

Que é a Certificación AIS?

A AIS considérase hoxe a certificación de accesibilidade máis integral e flexible do panorama internacional. Tendo en conta un amplo abano de persoas usuarias e as súas necesidades, acredita solucións de mobilidade, sensoriais e/ou cognitivas.

Orixinalmente, a Norma AIS 1/2018 desenvolveuse para comprobar e validar a accesibilidade de edificios e instalacións, e conta con máis de 500 indicadores que analizan os seus itinerarios, servizos, comunicación e información, e evacuación. Ademais, permite harmonizar estándares e requisitos procedentes da normativa nacional e internacional.

Este certificado é tan relevante a nivel nacional e internacional que grandes empresas como Google, El Corte Inglés, Coca-Cola, o Museo Nacional Centro de Arte Reina Sofía, os cines Cinesa e Yelmo, e mesmo o Real Madrid non dubidaron en contar co visto e prace da Fundación ARS nos seus edificios.

A partir desta primeira norma desenvolvéronse a Norma 2/2018, aplicada a contornas dixitais e páxinas web, e a Norma 3/2018, aplicada a mobiliario, sinalización, etcétera.

As tres normas funcionan de maneira moi semellante, cada unha no seu ámbito, como é lóxico. En ADDAW traballaremos coa Norma 2/2018 para os contidos dixitais, que segue os estándares de accesibilidade tanto nacionais (en España, o Real decreto 1112/2018) como internacionais (WCAG 2.1, UNE-EN 301 549, etc.).

Como características principais, a certificación AIS distingue cinco niveis de accesibilidade, do grao 1 ao grao 5, e ofrece sempre solucións para facer o edificio, o sitio web ou o obxecto avaliado máis utilizable, cómodo, seguro e, por extensión, accesible para todo o mundo.

Mentres que a Norma 1/2018 conta con máis de 500 indicadores para avaliar a accesibilidade dun edificio, a Norma 2/2018 ten máis de 100, xa que os sitios web son máis doados e cómodos de adaptar.

Porén, todas teñen un procedemento de certificación semellante: en primeiro lugar, realízase unha precualificación para detectar os aspectos que hai que mellorar; unha vez implantadas as solucións, a Fundación ARS outorga o certificado en función do nivel de accesibilidade; e, por último, faise un mantemento para asegurar que o estándar non baixa.

Deste xeito, o Certificado AIS garántelles aos seus clientes que sempre estarán ao día en accesibilidade, ofrecendo os mellores servizos a todas as persoas, sen importar as súas limitacións ou os pequenos problemas do día a día.

Por que é importante que unha empresa conte co Certificado AIS no seu contido dixital?

Hoxe, a accesibilidade é imprescindible á hora de desenvolver e manter unha páxina web ou unha aplicación móbil. Non só porque a inclusión das persoas con dificultades de calquera tipo (visuais, auditivas, motrices, etcétera) é necesaria en todos os ámbitos, senón tamén porque, a nivel económico, interesa chegar ao maior público posible.

Dado que seguir a normativa do Certificado AIS é totalmente voluntario, cando unha empresa amosa o seu distintivo está a demostrar o seu compromiso coa accesibilidade. O selo AIS é un aval que lles asegura comodidade e tranquilidade a todas as persoas á hora de acceder ao contido dixital.

ADDAW e o Certificado AIS

En ADDAW sempre nos esforzamos por ofrecer servizos de calidade á hora de auditar e de propoñer solucións de accesibilidade. O noso empeño viuse recompensado ao recibirmos o aval da Fundación ARS, que nos permite incluír o Certificado AIS nos nosos traballos.

En ADDAW garantimos que as nosas auditorías seguen ao pé da letra a normativa española vixente, así como a europea. Ademais, ao contar con este certificado ofrecémosche todas as medidas que este propón para que todo o mundo, a nivel internacional, poida gozar do contido dixital.

O proceso para obter a certificación AIS é sinxelo: nós encargámonos de realizar a auditoría de accesibilidade e, despois, enviámosche un informe con todos os erros que hai que corrixir. Unha vez que nos avisas de que están solucionados, facemos outra auditoría para confirmar que todo cumpre a Norma 2/2018 e, se é así, a Fundación ARS outorga o certificado, como comentamos antes, co nivel de accesibilidade axeitado para cada sitio web ou aplicación móbil. 

Así que non dubides en contactar connosco para solicitar información sobre como incluír este certificado na túa auditoría. Xuntos podemos facer de Internet un lugar accesible para todo o mundo.

Iris García García