ADDAWk euskarara egindako itzulpen ez-ofiziala da hau. Akatsak izan ditzake: dokumentu ofizial eta arauemaile bakarra W3Cren Web Content Accessibility Guidelines (WCAG) 2.2 jarraibideen ingelesezko jatorrizkoa da. Gaztelaniaz ere irakur dezakezu.
Multimedia sinkronizatuko edukian dagoen audio-eduki grabatu guztirako azpitituluak ematen dira, aurkezpena testuaren multimedia-alternatiba denean eta argi eta garbi horrela identifikatuta dagoenean izan ezik.
Betetze-irizpide honen asmoa da gorrek edo entzumen-urritasuna duten pertsonek multimedia-aurkezpen sinkronizatuak ikusi ahal izatea. Azpitituluek irisgarri egiten dute jatorriz soinuen bidez transmititzen den edukiaren zatia. Azpitituluek ez dituzte elkarrizketak bakarrik jasotzen; hizlaria nor den eta soinuen bidez transmititzen den gainerako informazio guztia ere identifikatzen dute, soinu-efektu garrantzitsuak barne.
Jakina da gaur egun zaila izan daitekeela denbora-mugak dituen materialerako azpitituluak ematea, eta horren ondorioz egileak materiala atxiki beharko du azpitituluak eskuragarri egon arte, edo material hori azpititulurik gabe argitaratu beharko du, gorrentzat irisgarria ez dela, gutxienez azpitituluak lortzeko behar den denboran. Etorkizunean, azpititulatzeko tresnek atzerapen horiek laburtu edo ezabatu ahal izango dituzte.
Azpitituluak ez dira beharrezkoak multimedia-aurkezpen sinkronizatua bera orrian testu gisa erakusten den informazioaren aurkezpen alternatibo bat denean. Adibidez, orriko informazioarekin batera testuak berak baino informazio gehiagorik erakusten ez duen multimedia-aurkezpen bat badago (baina arazo kognitiboak, hizkuntza-arazoak edo ikaskuntza-arazoak dituzten pertsonentzat irisgarriagoa dena), orduan ez da azpititulatu beharrik, informazioa orriko testuan edo testu-alternatibetan (adibidez, irudienetan) baitago.
Ikus, halaber, 1.2.4 Azpitituluak (zuzenean) betetze-irizpidea ulertzea.
Gorrek edo entzumen-galera duten pertsonek multimedia-aurkezpen sinkronizatuetako soinu-informazioa eskura dezakete azpitituluen bidez.
Tutorial azpititulatu bat
Bideo batek korapilo bat nola egiten den erakusten du. Azpitituluek hau diote:
'(musika)
Korapiloak egiteko soka bat erabiltzea trebetasun garrantzitsua zen
marinel, soldadu eta ehiztarientzat.'
Whit Andersonen transkripzio-formatuaren laginetik hartua.
Lege-dokumentu konplexu batek multimedia-aurkezpen sinkronizatu bat du paragrafo bakoitzerako, eta horietan pertsona bat ageri da paragrafoaren edukia ozen irakurtzen. Aurkezpen bakoitza dagokion paragrafoarekin lotuta dago. Ez da azpititulurik ematen multimedia-aurkezpen sinkronizatuetarako.
Pieza baten deskribapena eta beharrezko orientazioa dituen argibide-eskuliburu batek testuan azaltzen den guztia erakusten duen multimedia-aurkezpen sinkronizatu bat du. Ez da azpititulurik ematen aurkezpen sinkronizatuetarako.
Gaztelaniazko bideoa, euskarazko azpitituluekin. Ikusi YouTuben (WCAG 1.2.2 Azpitituluak (grabatua))
W3Ck betetze-irizpide honi lotzen dizkion teknika nahikoak, teknika gomendatuak eta ohiko akatsak, ADDAWk itzuliak. Teknika nahiko bat bakarrik nahikoa da adierazitako egoeran irizpidea betetzeko; gomendatuek gutxienekoa baino harago egiten dute; akatsek irizpidea betetzen ez duten egoerak deskribatzen dituzte.
G87: Aktibatu eta desaktibatu daitezkeen azpitituluak gehitzea, honako teknika hauetako edozein erabiliz:
Ikusi erreferentzia Teknikak eta hutsegiteak (W3C, ingelesez)