ADDAWk euskarara egindako itzulpen ez-ofiziala da hau. Akatsak izan ditzake: dokumentu ofizial eta arauemaile bakarra W3Cren Web Content Accessibility Guidelines (WCAG) 2.2 jarraibideen ingelesezko jatorrizkoa da. Gaztelaniaz ere irakur dezakezu.
Testu-irudiak apaingarri huts gisa soilik erabiltzen dira, edo testua aurkezteko modu jakin bat transmititutako informaziorako funtsezkoa denean.
Oharra: Logotipoak (logo baten edo marka-izen baten parte diren testuak) funtsezkotzat jotzen dira.
Betetze-irizpide honen asmoa da testua aurkezteko modu berezi bat behar duten pertsonei testua beren beharretara egokitzeko aukera ematea. Horien artean daude testuak letra-tamaina, aurreko planoko eta hondoko kolore, letra-familia, lerroarte eta lerrokatze jakin batzuekin behar dituzten pertsonak.
Horrek esan nahi du testua haren aurkezpena aldatu ahal izateko moduan inplementatzea, edo erabiltzaileek aurkezpen alternatibo bat hautatu ahal izateko mekanismoren bat ematea. Testu-irudiak erabiltzea da erabiltzaileei irudietan sartutako testuaren aurkezpena aldatzen uzten ez dien inplementazio baten adibidea.
Egoera batzuetan, testua aurkezteko modu jakin bat funtsezkoa da transmititzen duen informaziorako. Horrek esan nahi du informazioa galdu egingo litzatekeela aurkezpen-modu hori gabe. Kasu horietan, ez da eskatzen aurkezpena aldatzeko modurik egotea. Hemen sartzen dira testuaren itxura bisual jakin bat erakusteko balio duten testuak, letra-familia jakin bat adibidez, edo identifikazio gisa erabiltzen diren testuak, hala nola enpresa baten logotipoan sartzen direnak.
Erabilera apaingarria duten testuen kasuan, ez da eskatzen haien aurkezpen-modua aldatzeko aukera ematea.
Ikusmen urria duten pertsonak (egileak aukeratutako letra-tipoarekin, tamainarekin edo kolorearekin testua irakurtzeko zailtasunak izan ditzaketenak).
Testuei bisualki jarraitzeko zailtasunak dituzten pertsonak (egileak zehaztutako lerroartearekin edo lerrokatzearekin testua irakurtzeko arazoak izan ditzaketenak).
Irakurketan eragina duten desgaitasun kognitibo mota jakin batzuk dituzten pertsonak.
Aipu literal bat
Web-orri batek aipu literal bat du. Aipuaren testua letra etzanez aurkezten da, ezkerreko marjinan koska batekin. Aipuaren egiletzat jotzen den pertsonaren izena azpian dago, 1.5x-eko lerroarteko tartearekin eta marjinan koska handiagoarekin. CSS erabiltzen da testua kokatzeko, lerroarteko tartea zehazteko, eta testuaren letra-tipoa, tamaina, kolorea eta apainketa zehazteko.
Nabigazio-elementuak
Web-orri batek nabigazio-menu bat du, esteka bakoitza deskribatzeko ikono bat eta testu bat erabiltzen dituena. CSS erabiltzen da letra-tipoa, tamaina eta koloreak zehazteko, bai eta nabigazio-esteken arteko tartea ere.
Testua duen logotipo bat
Webgune batek enpresaren logoa du orri bakoitzaren goiko ezkerreko izkinan. Logoak testua du (logoaren zati gisa edo logo osoa). Testu horren aurkezpen bisuala funtsezkoa da logotipoa identifikatzeko, eta testuaren ezaugarriak aldatzen uzten ez duen gif irudi bat erabiltzen da. Irudiak testu alternatiboa du.
Letra-tipo baten erakusgarria
Web-orri batek letra-familia jakin bati buruzko informazioa du. Letra-tipoa beste batekin ordezkatuko balitz, erakusgarriaren helburua deuseztatuko litzateke. Aurkezpena testuaren ezaugarriak aldatzen uzten ez duen jpeg irudi batekin egiten da. Irudiak testu alternatiboa du.
Gutun baten erakusgarria
Web-orri batek gutun baten jatorrizkoaren erakusgarri bat du. Gutuna jatorrizko formatuan erakustea funtsezkoa da idatzi zen garaiari buruzko informazioa transmititzeko. Gutuna testuaren ezaugarriak aldatzen uzten ez duen gif irudi gisa sartzen da. Irudiak testu alternatiboa du.
Testu-karaktere sinbolikoak
Formulario batek testu-blokeak sartzeko aukera ematen die erabiltzaileei. Formularioak testuaren estiloa aldatzeko eta ortografia zuzentzeko botoiak ditu. Botoi horietako batzuek esanahidun sekuentziarik osatzen ez duten testu-karaktereak erabiltzen dituzte. Adibidez, 'B' letra lodia jartzeko, 'I' letra etzana jartzeko eta 'ABC' ortografia berrikusteko. Karaktere sinbolikoak testuaren ezaugarriak aldatzen uzten ez duten gif irudi gisa sartzen dira. Botoiek testu alternatiboak dituzte.
Gaztelaniazko bideoa, euskarazko azpitituluekin. Ikusi YouTuben (WCAG 1.4.9 Testu-irudiak (salbuespenik gabe))
W3Ck betetze-irizpide honi lotzen dizkion teknika nahikoak, teknika gomendatuak eta ohiko akatsak, ADDAWk itzuliak. Teknika nahiko bat bakarrik nahikoa da adierazitako egoeran irizpidea betetzeko; gomendatuek gutxienekoa baino harago egiten dute; akatsek irizpidea betetzen ez duten egoerak deskribatzen dituzte.
Ikusi erreferentzia Teknikak eta hutsegiteak (W3C, ingelesez)