ADDAWk euskarara egindako itzulpen ez-ofiziala da hau. Akatsak izan ditzake: dokumentu ofizial eta arauemaile bakarra W3Cren Web Content Accessibility Guidelines (WCAG) 2.2 jarraibideen ingelesezko jatorrizkoa da. Gaztelaniaz ere irakur dezakezu.
Web-orri multzo bateko hainbat web-orritan errepikatzen diren nabigazio-mekanismoak ordena erlatibo berean agertzen dira errepikatzen diren bakoitzean, salbu eta aldaketa erabiltzaileak berak eragiten badu.
Betetze-irizpide honen xedea da aurkezpen eta diseinu koherenteak erabiltzea sustatzea, webgune bateko orrietan errepikatzen den edukiarekin elkarreragiten duten eta funtzionaltasun edo informazio zehatz jakin bat behin baino gehiagotan aurkitu behar duten erabiltzaileei laguntzeko. Ikusmen urria duten pertsonek, aldi bakoitzean pantailaren zati txiki bat ikusteko pantaila-handigailuak erabiltzen dituztenek, sarritan arrasto bisualetan edo orriaren ertzetan oinarritzen dira errepikatutako edukia azkar aurkitzeko. Errepikatutako edukia ordena berean aurkeztea garrantzitsua da, halaber, errepikatutako edukia aurkitzeko memoria espaziala edo diseinuaren arrasto bisualak erabiltzen dituzten erabiltzaileentzat.
Garrantzitsua da argitzea 'ordena berean' esapideak ez duela esan nahi ezin direla azpinabigazio-menuak erabili edo ezin direla bigarren mailako nabigazio-blokeak edo orriaren egitura erabili. Aitzitik, betetze-irizpide honen helburua da gunearen orrietan errepikatzen den edukiarekin elkarreragiten duten erabiltzaileei laguntzea bilatzen ari diren edukiaren kokapena azkarrago aurreikusten.
Erabiltzaileek ordena aldaketa bat abiaraz dezakete erabiltzaile-aplikazioak erabiliz edo hobespenak ezarriz, informazioa beraientzat erabilgarriena den moduan aurkez dadin.
Errepikatutako osagaiak guneko orri bakoitzean ordena berean agertzen direla ziurtatzeak erabiltzaileei konfiantza ematen die, orri bakoitzean gauzak non aurkituko dituzten aurreikusi ahal izango dutelako. Horrek muga kognitiboak, ikusmen gutxi edo adimen-urritasuna dituzten erabiltzaileei laguntzen die, baita itsuei ere.
Kokapen finkoa duen kontrol bat
Bilaketa-eremu bat webgune bateko orri guztietako azken elementua da. Erabiltzaileek bilaketa-funtzioa azkar aurki dezakete.
Nabigazio-menu zabalgarri bat
Nabigazio-menu batek zazpi elementuko zerrenda bat du, webgune bateko atal nagusietarako estekekin. Erabiltzaile batek elementu horietako bat hautatzen duenean, bigarren mailako nabigazio-elementuen zerrenda bat txertatzen da nabigazio-menuaren maila nagusian.
Kokapen finkoa duen nabigazio-jauzi bat
'Nabigazioa saltatu' (edo 'joan eduki nagusira') esteka bat sartzen da webgune bateko orri bakoitzeko lehen elementu gisa. Estekak aukera ematen die erabiltzaileei izenburuak eta nabigazio-atalak saihesteko eta orri baten eduki nagusiarekin zuzenean elkarreragiten hasteko.
Nabigazio-menurako esteka bat
Esteka batek orriaren amaieran dagoen nabigazio-menura jauzi egiteko aukera ematen du. Esteka beti guneko orri bakoitzaren goialdean dago, teklatu bidez nabigatzen duten erabiltzaileek erraz aurki dezaten.
Gaztelaniazko bideoa, euskarazko azpitituluekin. Ikusi YouTuben (WCAG 3.2.3 Nabigazio koherentea)
W3Ck betetze-irizpide honi lotzen dizkion teknika nahikoak, teknika gomendatuak eta ohiko akatsak, ADDAWk itzuliak. Teknika nahiko bat bakarrik nahikoa da adierazitako egoeran irizpidea betetzeko; gomendatuek gutxienekoa baino harago egiten dute; akatsek irizpidea betetzen ez duten egoerak deskribatzen dituzte.
Ikusi erreferentzia Teknikak eta hutsegiteak (W3C, ingelesez)